SILVIA FERRETTO,
(FACTIONIS COMPENDIARIIS LITTERIS AN APPELLATAE)
RADICES ALTE ACTAE NON CONGELANTUR

LEX HODIE IN REGIONIS SEDE DIURNARIIS ITALICE AC LATINE EST EXPLANATA, ADIUVANTE CIRCULO PHILOLOGICO MEDIOLANENSI. LINGUA LATINA - ITA EXORDIUM SUMPSIT SILVIA FERRETTO CLEMENTI, COLLEGII CULTUI HUMANO PROVEHENDO PRAESES EADEMQUE LEGIS AUCTRIX- PRAECIPUUM EST NOSTRI CULTUS CIVILIS ET RELIGIONIS SYMBOLUM ATQUE IN EAM ALTE RADICES AGUNT QUUM ITALORUM TUM ET EUROPAEORUM CIVITATES. SIQUIDEM, UT AIT TOLKIEN ILLE, RADICES ALTIUS ACTAE NON CONGELANTUR, LATINITAS CERTE NON EST EMORTUA, AT, LICET INSCIIS NOBIS, VIGET NOBISCUMQUE IN IPSA VITA COTIDIANA CONVERSATUR. VIGET ENIM LATINITAS NOBIS INCLUSA MEDULLIS, VIGET NOSTRIS IN SERMONIBUS ET DIALECTIS ET LEGIBUS ET MONUMENTIS, VIGET OMNIBUS IN PLAGIS EUROPAE, NOSQUE MONET EUROPAEORUM CULTUM CIVILEM NON TAM INNITI EODEM REI NUMMARIAE FUNDAMENTO, QUAM QUODAM COMMUNI DIUTURNOQUE VINCULO, QUOD AD POLITIOREM HUMANITATEM PERTINET, CONTINERI.  

QUID EST - INQUIT SILVIA FERRETTO - HOMINES AD HUMANITATEM FORMARE, NISI EFFICERE UT SINT AD IUDICANDUM CELERES, AD PERCIPIENDUM ACUTI, IN COGITANDO LIBERI ATQUE EXPEDITI? NONNE VERO SI HUMANITATIS STUDIA EXTINGUUNTUR, HOMINUM OBTUNDUNTUR INGENIA?

QUODSI AUTEM ILLUD GEORGII ORWELL REPETIERIMUS, IN FABULA CUI TITULUS "ANNUS MCMLXXXIV" SCRIBENTIS QUI RES PRAESENTES OBTINET, EUM OBTINERE ET PRAETERITAS, QUI TENET PRAETERITAS, EUNDEM ET FUTURAS TENERE, VIDEBIMUS QUID EX OBLIVIONE CULTUS CLASSICI SIT CONSECUTURUM: HINC MINUETUR NUMERUS "APOTORUM"- SIC PER IOCUM A MONTANELLIO APPELLATI SUNT II QUI, QUASI MENDACIORUM TEMETO CARENTES, DIFFICULTER AD CREDENDUM IMPELLUNTUR - HINC PLURES IN ANNOS FIENT MINISTRI, DICTO AUDIENTES, QUAM CIVES ACRIORIS IUDICII SUIQUE COMPOTES. ANNE EO SPECTANT NONNULLI?

HAEC EST CAUSA CUR LINGUAE CULTUSQUE LATINI STUDIA  SINT ITERUM IN SCHOLAS MEDII ORDINIS INDUCENDA, ADEO UT LIBERI NOSTRI SENTIANT ESSE SE NON ALIENIGENAS SED COMMUNIS PATRIAE CONSORTES.

OPORTET DENIQUE UT SCHOLA NON RESPICIAT TANTUM INDUSTRIAM QUAESTUOSAM, IMITATIO ANGLICAE CONSUETUDINIS, INTERRETIS ABUSUM -TRIPLICEM "I" APPELLANT- SED ETIAM "C" TRIPLICEM ASSEQUATUR, SCILICET CULTURAM ANIMORUM, CERNENDI FACULTATEM, COGITANDI CONSUETUDINEM.  

SUBSCRIPSERUNT FERRETTO, FATUZZO, PONZONI, BOMBARDA, PROSPERINI, ROSSONI, VALAGUZZA, RAIMONDI, MAIOLO, LA RUSSA, BOSCAGLI, PIROVANO, BERTANI, MAULLU, FERRAZZI, BORDONI, MACCONI, VALENTINI, MONGUZZI, BONFANTI, FARIOLI, REGIONIS CONSILIARII.

DATUM MEDIOLANI A.D.XIV KAL.MAIAS ANNO POST CHRISTUM NATUM MMII